Styttist óðum, 11 dagar

26.08.2015 12:11

Hrútarnir okkar

Ég labbaði upp í fjallshólf í morgun til að kíkja á hrútana. Ég tók myndir af þeim, en þær eru nú ekki nógu góðar, því það var svo rennandi blautt grasið og þar af leiðandi voru hrútarnir frekar blautir

14-571 Nagli. Ætt Nagla. Nagli-Skrúfa-Mörk-Botna.

Faðir 09-861 Dalur

14-572 Drýsill. Ætt Drýsils. Drýsill-Tajna-Tabbý-Botna

Faðir 09-892 Dolli

14-573 Bekri. Ætt Bekra. Bekri-Pjökk-Ösp-Perla-Sæla-Botna

Faðir 13-388 Ebiti

14-574 Eros. Ætt Erosar. Eros-Tugga-Gríma-Tabbý-Botna

Faðir 10-931 Radix

14-575 Geir. Frá Myrká

Faðir 12-560 Jarl Móðir 07-013 Húfa

14-576 Örvar. Frá Litla-Hofi í Öræfasveit

14-577 Bæsi. Frá S-Bægisá

Faðir 10-903 Hængur Móðir 08-135

14-578 Greifi. Frá Þrasastöðum í Fljótum

Faðir 11-092 Chapplin Móðir 11-225

Þetta er Tabbý. Hún var amma hans Drýsils og langamma hans Erosar. Hún var ömmusystir Nagla og langa,langaömmusystir Bekra

Þetta byrjaði allt hér. Hér er Botna (gemlingur) formóðurin með Tabbý. Það eru mjög margar kindur sem við eigum undan þeim.

Drýsill, 26.08.15

Drýsill, 11.10.14

Nagli, 26.08.15

Nagli, 11.10.14

Þar sem ég var að ganga um fjallshólfið, rakst ég á þennan hrossagauksunga. Greyið litla. Ég held að hann verði ekki orðinn nógu stór til að lifa af og komast af landi brott, það er orðið svo áliðið. Mamman var hjá honum.

Damian að bíða eftir skólabílnum. Honum finnst gaman að fara í skólabílinn og skólann. Alltaf jafn spenntur.

Skólabíllinn að koma með Damian heim

Myndir í albúmi emoticon

Molinn kveður

Written by Birgittu

25.08.2015 22:36

Kindarúntur

Það er mjög skrítið að vera svona barnlaus á daginn.

Ég fór á kindarúntinn í dag og var lengi, 3-4 tíma. Samt var tíminn alltof fljótur að líða.

Hrútur undan Filmu og Bekra, tekið 19. maí

Og þessi mynd tekin í dag. Hann er orðinn svona stór núna.

Gimbur undan Eik og Ebita, tekin 21. maí

Og þessi mynd tekin í dag. Hún er orðin svona stór núna.

Molinn kveður

Written by Birgittu

24.08.2015 22:53

Lífið er yndislegt

Nú er Damian byrjaður í skólanum. Hann fer með skólabílnum kl. 8 á morgnana og kemur aftur um kl. þrjú. Það er nú svolítið skrítið að vera ein heima á daginn. Það er samt ENGIN hætta á að mér leiðist. Ég hef nóg að gera emoticon

Á morgun ætla ég að fara á kindarúntinn og njóta þess í botn emoticon

Damian fyrir utan skólann sinn, Þelamörk

Snilld að hafa myndir af öllum lömbunum í símanum mínum. Nú get ég skoðað myndirnar hvar og hvenær sem er. Myndirnar eru 369 emoticon

Við skruppum í Baugasel í dag. Sigga, Anna og Svanberg fóru með okkur. Hitinn fór í 21 stig. Það er mjög skrítið að hafa svona hita. Frábær dagur. Vona að dagurinn á morgun verði heitur og góður.

Nokkrar myndir fóru í albúm.

Molinn kveður

Written by Birgittu

20.08.2015 22:21

Skólasetning

Í dag fórum við Damian með skólabílnum, á skólasetningu Þelamerkurskóla. Hann var svo spenntur að fara í skólann með rútu. Hann stóð sig vel, bæði í rútunni og skólanum. Ég held að hann eigi eftir að standa sig vel í vetur emoticon

Kindarúntur, alltaf jafn gaman. Nú styttist óðum í réttir. Ég er orðin mjög spennt emoticon

Þetta er gimbur undan Brák. Brák var þrílembd, átti tvær gimbrar og einn hrút. Hrúturinn var vaninn undir Össu. Hún á að vera með tvær gimbrar, en er bara með aðra gimbrina. Vonandi er hin gimbrin á lífi. Það kemur í ljós eftir nokkra daga.

Molinn kveður

Written by Birgittu

19.08.2015 08:10

Yndislegt líf

Hvar skal byrja ?

Þessi fallegi drengur heitir Damian. Hann verður 7 ára í desember. Hann kom í fóstur til okkar 1. júlí og verður í eitt ár. Hann er að hefja skólagöngu núna eftir helgi. Hann fer í annan bekk og skólinn hans er Þelamörk (sundlaugarskólinn eins og hann kallar hann). Vonandi gengur það allt vel hjá honum.

Hér er búið að vera mikið fjör frá því í byrjun júní og til dagsins í dag. Sumardvöl, helgardvöl, dagpössun og ömmu og afabörn. Ég held að það séu um 20 börn sem hafa dvalið hjá okkur þennan tíma.

Þar á meðal voru það þessi ömmu og afa gull, Einar Breki og Haukur Nói

Og þessi ömmu og afa gull, Dagur Árni og Jökull Logi

Ömmu og afa gull kom líka í smá heimsókn, hún Árdís Marín.

Við söknum þess að hafa ekki séð tvö ömmu og afa gull í sumar. Ísabellu og Kristófer. Vonandi líður ekki langur tími þar til við hittum þau.

Vinir okkar, Dísa, Emil og krakkarnir komu í heimsókn 11. ágúst. Það er alltaf svo gaman þegar við hittumst. Þakka ykkur innilega vel fyrir komuna elsku fjölskylda.

Dísa er með heimasíðu sem er http://isak.123.is

Endilega kíkið á síðuna hennar emoticon

það er svo merkilegt við okkar vinskap, að hann byrjaði á netinu. Bara í gegnum síðurnar okkar. Kinda, kinda kinda vinkonur. Það er svo gaman emoticon

Þessir bræður fæddust 22. apríl. Móðir þeirra var að losa sig við þá, var í rauninni að láta og þeir fæddust nánast andvana. Okkur tókst að koma lífi í þá, en þessi flekkótti dó fljótlega. Þessi hvíti lifði þetta af, en eitthvað hefur hann skaddast í höfðinu greyið. Hann flokkast undir það að vera þroskaheftur. Við höfðum miklar áhyggjur af honum í vor hvort hann mundi hafa það af í sumar. Hann reygir höfuðið aftur og gengur í hringi. Hann gerir þetta aðeins ennþá. Hann er hér í fjallshólfinu og hefur það bara mjög gott. Honum hefur nú samt farið mikið fram. Hann heitir Hringur emoticon

Hann hefur heldur betur stækkað. Er áreiðanlega orðinn um 40 kg.

Þessir eru líka upp í fjallshólfi. Þetta eru hrútarnir okkar

Við fórum upp í fjallshólf til að athuga með ber. Það eru ENGIN ber núna í ár. Það er líka ekki búið að vera neitt sumar hér.

Júlli, Damian og Tómas

Við förum reglulega á kindarúntinn. Við sjáum mismargar í hverri ferð. Hér er Þóra með tvo hrúta. Þeir eru nú ekki hausfríðir þessir. Þeir eru undan Garra og hann er kollóttur.

Eitthvað er ég búin að setja inn af myndum, en þær eru nú ekki margar. Ég hef ekki verið dugleg að taka myndir í sumar

Molinn kveður

Written by Birgittu

15.08.2015 08:42

Heyskapur

Jæja góðan daginn hér. Þið sem hafið saknað mín hér, þá get ég sagt ykkur það að ég er á lífi emoticon

Það er búið að vera "stuð" hér í sumar. Mjög mikið að gera og þá meina ég mjög mikið og það í allt sumar. Það hefur ekki verið mikill tölvutími hér.

Kindurnar fóru nánast allar á fjall. Hrútarnir og nokkrar kindur eru hér í fjallshólfinu. Við erum búin að fara nokkra kindarúntana í sumar. Þær eru mismargar sem láta sjá sig í hverjum rúnti. Lömbin eru svona þokkaleg. Mættu vera stærri.

Nokkrar búnar að fá brauð

Við erum búin að heyja fyrri sláttinn. Það er samt spurning hvort við sláum aftur. Við þurfum mikla beit fyrir allt þetta fé.

Fjallsstykkið var slegið 9. júlí og rúllað 17. júlí. 32 mjög stórar rúllur á því.

Frímerkið norðan við skjólbeltið var slegið 9. júlí og rúllað 17. júlí. 12 mjög stórar rúllur á því.

Fjárhústúnið slegið 21. júlí og rúllað 27. júlí. 90 rúllur á því.

Syðsta stykkið okkar sem er sunnan við fjárhústúnið var slegið 23. júlí og rúllað 27. júlí. Það voru 40 rúllur á því.

Litla stykkið sunnan við prestfjárhúsin var slegið 24. júlí og rúllað 27. júlí og þar voru 11 rúllur.

Stykkið niður á engi var slegið 24. júlí og rúllað 29. júlí. 65 rúllur þar.

Alls eru þetta 250 rúllur.

Svo eigum við rúllur síðan í fyrra sem hægt er að gefa með.

En það kemur fljótlega í ljós hvort við þurfum að slá aftur. Ekki hefur nú verið gott sumar hér.

Ég ætla að láta þessa síðu lifna við, en læt þetta duga í bili.

Molinn kveður

Written by Birgittu