Já góðan dag hér.

Héðan er allt gott að frétta. Það eru þrír krakkar hér þessa helgi, Þau Júlli, Siggi og Sesselía.

Við fórum í sveitina í gær, og fórum með tvær kanínur sem ætla að fá að vera þar. Að öllum líkindum  förum við svo aftur í dag, því það á að setja nautin út. Það verður fjör á þeim sveitabæ.

Júlli fór í afmælisveislu frá kl. 14-17. Við hin skelltum okkur í tvær veislur á meðan. Það var verið að skíra prinsinn þeirra Halla og Svönu, og hann fékk nafnið Gabu gabu, he he he. Nei hann fékk nafnið Kristján Skjóldal Haraldsson. Það var víst þannig að þegar presturinn spurði: hvað á barnið að heita, þá sagði Halli gabu, gabu. Hann var víst búinn að  semja við prestinn að segja þetta og láta fólkið fá létt áfall. Held að það hafi tekist alla vegana með eina manneskju. Við skulum nú ekki láta það í ljós hver hún var, en fyrsti stafurinn byrjar á mamma. He he he þetta er Halla líkt þeir sem þekkja hann.

Við fórum svo í útskriftar veislu til Sigrúnar Simma, en hún var að útskrifast sem stúdent.

Ég setti inn nokkrar myndir úr útskriftinni, en ég tók enga mynd úr skírnarveislunni. Léleg ég. Ég verð bara að fá lánaðar myndir frá drottningunni. Hún hefur líklegast tekið myndir á sína góðu vél.

Molinn kveður.

Jæja góðan dag hér.

Já ég var að slá í gær lóðina hér. Það veitti ekki af. Allt orðið kafloðið af grasi. Það gekk nú brösulega að koma sláttuvélinni í gang. Var búin að reyna allan laugardaginn, tók kertið úr og burstaði það með vírbursta og setti nýtt bensín á vélina, en ekkert gekk. Ég tók mig þá til og sló alla lóðina með litlu rafmagnsorfi. Það tók sinn tíma og viti menn þegar ég var búin að saxa allt niður og ganga frá þá prufaði ég að setja sláttuvélina í gang og hún rauk þá í gang. Þannig að eftir svona viku þá slæ ég með vélinni.

Ég var í fríi þessa helgi frá börnum, en fæ  þrjú næstu helgi.

Jæja nú er Þórhallur byrjaður að vinna í MS Akureyri. Ég vakti hann korter fyrir sex í morgun og við renndum í vinnuna. Ég held að honum hafi líkað þetta vel. Hann var að vísu þreyttur og ég held að hann  sofi núna. He he he.

Molinn kveður.

Já góða kvöldið hér!!!

Jæja byrjuð að vinna aftur eftir 6 daga veikindafrí. Er að vísu ekki nógu ánægð með hnéð á mér. Það ætlar að taka tíma að ná því góðu. Það var nefnilega stærsti hnúturinn sem lá yfir það. Eeennnn þetta hlýtur að jafna sig. Ég vann að vísu ekki stuttan vinnudag. Það urðu 11 og hálfur klukkutími.

Ég bætti við myndum í gær í hvítasunnu almbúmið.

Svo er nú allt í lagi að kvitta gott fólk.

Ætla að henda mér í stólinn í stofunni og láta fara vel um mig þar.

Molinn kveður.

Halló!

Já við fórum í sveitina í gær og ætlum aftur núna á eftir. Ég setti inn myndir í nýtt albúm sem heitir hvítasunnuhelgin. Set kannski fleiri myndir þar inn. Helgin er ekki búin.

Það gengur mjög vel með krakkana. Þau una sér vel í sveitinni.

Jæja ætlum að taka okkur til.

Molinn kveður.

Halló !!!!!

Í gærkvöld kl. 23  hringdi síminn minn og það var hún Guðrún Helga. Hún sagði er ég að vekja þig. Ég neitaði því og spurði hana hvað hún væri að gera, því ég heyrði að hún var áreiðanlega í bíl. Það var rétt hjá mér, hún sagðist vera að rúnta með Glúbba. Svo töluðum við saman í smá stund. Svo sagði hún: ég get ekki talað lengur, síminn minn er að verða straumlaus. Við kvöddumst þá bara. Nokkrum mín. síðar var dinglað og fyrir utan stóð Guðrún Helga. En ég var svo viss um að það væri einhver að spyrja um Þórhall að ég tók seint við mér að þetta var bara Guðrún. ÉG ÞURFTI AÐ HORFA TVISVAR. En Guðrún mín gaman að fá þig hingað norður. Þarna náðir þú gömlu.

Nú eru hér þrír krakkar. Júlli, Siggi og Sesselía. Það gengur allt vel.

Það gengur ekki of vel með sauðburðinn. En það á samt bara ein eftir að bera. Kindurnar verða áreiðanlega settar út á morgun. Það er varla hægt í dag það er svo leiðinlegt veður, held að veðrið verði betra á morgun.

Molinn kveður.

Jæja góðan daginn hérna.

Heilsan er ágæt og fer batnandi með hverjum deginum. Er ennþá í veikindafríi. Fer að vinna aftur líklegast á þriðjudaginn næsta.

Sauðburður gengur nú ekki vel í sveitinni.  Það hafa sex lömb drepist í burði eða verið dauð þegar þau hafa fæðst. Tveir gemlingar hafa drepist, eða sko einn drapst og það þurfti að lóga hinum. Þetta er nú ekki gott ástand. En svona er nú bara lífið.  Ég held að það séu 6 eftir að bera.  Fer í dag og tek myndir og set þær svo inn í sauðburðar almbúmið. Það eru komnar nokkrar myndir þar inn nú þegar. Og ég setti inn myndir í almbúmið dagarnir 1-4 maí.

Jæja ég var að hringja í Sesselju, sú sem er yfir dagmömmunum og það á að taka inn dagmömmur í ágúst. Það er akkúrat tíminn fyrir mig, ef mig langar til að gerast dagmamma.  Það á nú eftir að koma í ljós hvað mig langar til að gera. En hún sagði að ég þyrfti ekkert að gera nema byrja. Jú það þarf að taka út íbúðina og sjá hvort allt sé í lagi hér. Sjáum hvað setur.

Molinn kveður.

Halló !!!

Jæja eins og þið sjáið á þessum skrifum, þá er ég nú komin heim.  Ég held að ég hafi sofnað í kringum 9:15 .  Ég var svo vöknuð kl. 11:30, og farin út af sjúkrahúsinu kl. 14:10. Þetta gekk allt vel. Teknir hnútar af báðum fótum, og líðan hjá mér er bara góð. Fann enga ógleði eða svima þegar ég vaknaði. Þetta er nú eitthvað skrítið hvað þetta tengist Stefaníu hans Ogga. Þegar ég fór síðast í æðahnútaaðgerð var það á afmælisdeginum hennar Guðrúnar Lindu 21.júli 2004 og svo núna 2. maí á afmælisdeginum hennar Stefaníu. En eins og ég sagði þá er ég við hestaheilsu.

Molinn kveður.

Hæ.

Ætlaði bara að láta ykkur vita að ég er að fara upp á sjúkrahús í svæfingu. Ég held samt að ég sé það mikið dofin eftir þessa atburði 30. apríl, að ég mundi ekki taka eftir neinu þótt ég yrði skorin án svæfingu eða deifingu. Þannig er það nú.  Læt heyra í mér í dag.

Molinn kveður

Halló !!!!

Vegna þeirra hörmulegra atburða sem komu upp í vinnunni minni í gær, það er að segja að einum af fjölhæfasta og reyndasta starfsmanni var sagt upp fyrirvaralaust og án skýringa, hef ég tekið þá ákvörðun að segja upp hjá þessu fyrirtæki. (Er reyndar búin að því.)  Það er mín skoðun að svona framkoma við einstaka starfsmenn sé ekki sæmandi, og þar af leiðandi ekki hægt að vinna undir svona háttarlagi.

Þannig að ég er að hætta hjá MS Akureyri.

Endilega commentið þið með skoðun ykkar á þessu.

Molinn kveður. Mjög dapur.