Þetta er síðan hennar Birgittu Lúðvíks.


Flettingar í dag: 357
Gestir í dag: 14
Flettingar í gær: 2149
Gestir í gær: 23
Samtals flettingar: 865268
Samtals gestir: 46744
Tölur uppfærðar: 19.3.2024 08:34:28

Færslur: 2011 Mars

31.03.2011 20:10

Aðgerð :-)

Jæja, þá fer ég í aðgerð kl. 8 í fyrramálið. Ég vona bara að það gangi vel, og hann geti hreinsað þetta eitthvað þannig að ég verði góð.
Ómar verður hjá okkur um helgina.
Ég vona að ég geti verið eitthvað í sveitinni um helgina. :-)
OOOOOHHHHH ég sá lamb í sjónvarpinu áðan. Fékk léttan sauðburðarfíling.


Molinn kveður.

29.03.2011 21:04

Græddi 100 þúsund krónur :-)

Jæja helgin búin, og hún var góð. Við fórum í fimmtugs afmælisveislu hjá Hafeyju systir (drottningunni) á laugardaginn. Það var mjög gaman. Ég læt inn myndir af því seinna.
Siggi og Júlli voru hjá okkur um helgina. Sigga tengdamamma var hjá þeim meðan við vorum í veislunni hjá Hafeyju.
Ég var að græða 100 þúsund krónur. JIBBÍ. Ég var að fá þær fréttir að ég þarf ekki að borga 100 þús. þegar ég fer í aðgerðina á föstudaginn. Þótt það verði ekki búið að semja á milli læknana og tryggingarstofnunar, þá greiðir tryggingarstofnun fyrir mann. 
Ég var að fatta það, að á fimmtudaginn eftir vinnu, þá á ég ekki eftir að vinna nema 7 daga þangað til í júní. Ég er nefnilega að fara í sjúkrafrí, og líka í fæðingarorlof. Ég vinn 9-14 maí, og 30-31 maí. Þannig að ég er að fara í nærri tveggja mánaðar frí emoticon


Molinn kveður.

25.03.2011 22:04

Gerfiliður ???? Nei vonandi ekki

Ég fór til læknis í gær, og viti menn ég á að fara í aðgerð á hnénu. Það á að spegla það, og athuga hvort það sé eitthvað að angra mig þarna inní. Ég á að fara 1. apríl. Það er ekki aprílgabb, en ég vona að kostnaðurinn við það sé aprílgabb. Ég þarf að punga út hundraðþúsundkarli. Það er eitthvað útaf því að samningar eru að renna út, á milli sérfræðinga og tryggingarstofnunar. Þeir renna út 31. mars, og ég á að fara 1. apríl. Vonandi verða þeir búnir að semja, því þá þarf ég ekki að borga nema 30 þús. Ef það batnar ekkert við þessa speglun, þá er næst á dagskrá gerfiliður. Ég spurði lækninn hvort ég væri ekki of ung fyrir þá aðgerð, og hann svaraði, að það væri ekki verið að láta manneskju þjást í 10-15 ár, bara af því að hún er ekki orðin nógu gömul. Bara að skipta um. En vonandi nær hann að laga þetta í spegluninni.
Við Þórður fórum í gærkvöld, á fund hjá fjárræktarfélaginu Neista. Það var aðalfundur félagsins. Ég tók nokkrar myndir, og er búin að setja þær inn.
Róbert Smári fór með okkur í sveitina í gær. Þegar hann fór inn í bílinn, sagði hann: VÁ, ÆÐISLEGA FLOTTUR BÍLL. PABBI Á EKKI SVONA BÍL. Og þegar hann sá sjónvarpið í bílnum sagði hann:  VÁ, EN FLOTT, PABBI VERÐUR AÐ KAUPA SVONA. Hann er svo mikið krútt.  Hann var ekkert hræddur við kindurnar eða hænurnar. Hann fór inn í hænsna búrið og náði í eggin. Ég held að honum hafi þótt gaman að fara í sveitina á svona flottum bíl, hahaha.


Molinn kveður.

23.03.2011 20:13

Stórafmæli nálgast

Fimmtudagur á morgun, og þá fer ég til læknis. Sjáum til hvað kemur út úr því.
Þórður er farinn að fara í sveitina á morgnana, til að gefa kindunum. Við erum búin að gefa þeim tvisvar á dag síðan þær voru klipptar, til að þær kviðrifni ekki. Í  morgun þegar hann fór,  þá festi hann sig, ha, ha, ha. Sverrir þurfti að redda honum, og dróg hann yfir snjóinn, hahaha. Þótt að Þórður fari í sveitina, er hann samt kominn í vinnu rétt rúmlega sjö. Þá er hann búinn að fara heim og fara í sturtu. Við vöknum alltaf svo snemma.
Jæja núna 26. mars er komið að stórafmæli hjá Drottningunni. Hún Hafey systir mín verður 50 ára. Hún er ári eldri en ég, og það merkir það að ég verð fimmtug á næsta ári. Miðað við líkamlega hrörnun mína, þá mætti halda að ég væri að verða sjötug, já eða áttræð. Haha.

Föðurbróðir minn, hann Alfreð Jónsson lést í gær. Blessuð sé minning þín Addi minn.







Molinn kveður.






21.03.2011 20:59

Sveitin góða

Jæja nú er mánudagur á enda kominn. Ég var að vinna bæði laugardag og sunnudag, og það var bara gaman. Ég var orðin mjög syfjuð kl. níu í gærkvöld, þannig að ég fór bara að sofa þá, og  svaf alveg til að verða sex í morgun.
Ég fór í sveitina eftir vinnu bæði á laugardag og sunnudag. Ég er alltaf að reyna að fá hænurnar til þess að verpa í kassana. Það gengur nú frekar hægt. Í gær tók ég eina sem var að fara að verpa á gólfið, og setti upp í kassa. Hún var alveg ánægð með það, og verpti. Þá eru það 4 hænur, held ég, sem verpa í kassana. Þetta kemur vonandi hjá þeim. Það koma svona 8-10 egg á dag.
Það styttist í sauðburð, bara einn mánuður og fimm dagar þangað til litlu krílin koma í heiminn.
Ég er að fara til læknis á fimmtudaginn. Það fer nú að verða lítill tími til þess að ná hnénu góðu fyrir sauðburð. Spurning hvort það takist ????????????????
Ég var í sveitinni áðan, og varð fyrir árás. Ég er stundum að læða fóðurblöndu að nokkrum kindum, þar á meðal Tabbý og Grímu. Gríma var svo áköf að hún var næstum búin að gleypa hendina mína. Ég er með sár eftir hana ha ha. Þær eru svo gráðugar.


Molinn kveður.



18.03.2011 23:20

Vinna

Núna um helgina eru engir litlir guttar hjá okkur. Það koma tveir næstu helgi.
Ég er hinsvegar að vinna bæði á morgun og á sunnudaginn. Ég skrepp nú samt í sveitina á eftir vinnunni, vonandi báða dagana.

Molinn kveður.

17.03.2011 22:01

Lítill bumbubúi




Já þetta er hún Guðrún Helga. Hún er ólétt, og er komin 15 vikur. Ég held að litli stubbur komi beint í réttirnar í haust. Settur tími er held ég 7. september. Þegar verið var að telja fósturvísana í kindunum, þá lét hún telja í sér, og viti menn, litli stubbur sást greinilega í sónartækinu og er einn á ferð.
Ég er búin að vera með mikla verki í hnénu í dag. Ég fékk að fara heim kl. 15:30. Það var vinna til ca. 20 í kvöld. Ég held að andlega hliðin sé ekkert að verða betri en sú líkamlega. Þetta er afskaplega þreytandi að vera svona.


Molinn kveður.





14.03.2011 22:16

Rok, rok

Jæja helgin búin, og mánudagur á enda kominn.
Það voru tveir strákar hér um helgina, þeir Júlli og Ómar.
Það gengur vel í sveitinni. Við erum búin að láta rýja kindurnar. Það var gert miðvikudaginn 9. mars.
Hænurnar verpa vel. Það komu 9 egg í gær, og tíu egg í dag, og eitt af þeim var ponsulítið, eða á stærð við lítið vínber. Einhver hænan að byrja að verpa.
Við fórum í Lyngbrekku í dag, til að athuga hvort það væri allt í lagi þar, eftir allt þetta rok. Allt í góðu standi þar.
Ég er að fara aftur til læknis, með þetta hné mitt, 24. mars. Ég vona þá að hann ákveði að gera eitthvað annað en að sprauta í það.  emoticon


Molinn kveður.

08.03.2011 20:01

Borg óttans

Jæja hvar skal byrja ??
Siggi Tumi kom til okkar á miðvikudaginn.  Við náðum í hann í skólann, og komum honum svo í skólann á fimmtudag og föstudag. Hann fór svo á sunnudaginn, frá okkur.
Hildibrandur í Bjarnarhöfn kom til okkar á miðvikudag, og var hjá okkur til sunnudags. Hann var að fara í hnjáliðaskipti. Það var gerð aðgerð á honum á mánudag, (í gær), og það gekk vel.
Á sunnudaginn, 6.mars, sprautuðum við kindurnar gegn lambablóðsótt og flosnýrnaveiki. Við verðum svo að sprauta þær aftur eftir þrjár til fjórar vikur.
Við ákváðum að fara suður, og gerðum það. Sigga tengdamamma fór með okkur. Við lögðum af stað rétt rúmlega fimm á sunnudaginn. Öxnadalsheiðin var ófær, þannig að við fórum bara í gegnum Siglufjörð, og þá leiðina suður. Við fórum í gegnum 5 göng, Ólafsfjarðar, Héðinsfjarðar, tvenn göng þar, Strákagöng og Hvalfjarðargöng. Veðrið var mis gott á leiðinni. Mjög leiðinlegt á Holtavörðuheiðinni. Við þurftum að stoppa stundum, því við sáum ekkert á milli stikna. Við vorum komin suður rétt fyri kl. eitt aðfaranótt mánudags. Loksins þegar við ákváðum að fara suður, þá var veðrið ekki gott. Það snjóaði mest allan tímann fyrir sunnan, og það er víst mesti snjór vetrarins þar núna.
Við gátum heimsótt Sigurjón og fjölskyldu, og Friðrik og Yumiko. Við gistum hjá Guðrúnu og Nonna. Flott nýja (gamla) íbúðin þeirra, sem þau voru að flytja í. Þetta var stutt, en góð ferð hjá okkur. Við komum heim um kl. sjö í kvöld. Góð færð og gott veður alla leið heim. Það stytti upp í Reykjavík þegar við vorum að leggja af stað norður. Held að þetta fylgi okkur eitthvað.
Svo er það vinna á morgun.
Það á að rýja kindurnar á morgun.
Júlli og Ómar Snær koma næstu helgi.


Molinn kveður.

01.03.2011 22:06

1. mars

Jæja nú er kominn 1. mars. Ömmu strákurinn minn, hann Dagur Árni, á afmæli í dag. Hann er orðinn 5 ára. Vá hvað tíminn líður hratt. Bara eitt ár þangað til hann byrjar í skóla. Þeir bræður ætla að koma til okkar í vor, og vera með okkur í sauðburðinum. Við ætluðum að fara suður um helgina, í afmæli til hans, en ég þarf að vinna á laugardaginn, þannig að við verðum að heimsækja hann seinna. Til hamingju með daginn elsku Dagur minn.
Siggi Tumi er að koma til okkar á morgun, og verður þangað til á sunnudaginn. Hann fer að vísu í skólann, þessa tvo daga. Ég sæki hann þessa þrjá daga, og Þórður fer með hann þessa tvo morgna. Hann verður einn hjá okkur þessa helgi.
Það komu 8 egg í gær og aftur 8 egg í dag. Duglegar þessar hænur.
Líklegast verð ég með bollukaffi í sveitinni á sunnudaginn. Það er allavegana bolludagur á mánudaginn, og ég tek alltaf forskot á sæluna emoticon


Molinn kveður.

  • 1


clockhere

Nafn:

Birgitta Lúðvíksdóttir

Farsími:

820-7756

Afmælisdagur:

23. júlí, 1962

Heimilisfang:

Möðruvellir 3

Staðsetning:

Hörgársveit

Um:

Áhugamanneskja um sauðfjárrækt. Er með kindur á Möðruvöllum í Hörgársveit

Einar Breki, kom í heiminn

atburður liðinn í

12 ár

6 mánuði

5 daga

Haukur Nói, kom í heiminn

atburður liðinn í

9 ár

8 mánuði

7 daga

Birgitta Ósk, kom í heiminn

atburður liðinn í

2 ár

2 mánuði

5 daga

Tenglar