Eins og ég sagði í gærkvöld, þá fór ég í fjárhúsin til að athuga hvort einhverjar væru að bera. Það voru tvær að byrja. Önnur þeirra var veturgömul með þrjú og átti ekki tal fyrr en 4. maí. Hún sem sagt var að "láta". Það voru tvö löngu dauð fóstur og svo gimbur sem hafði líf. Ég var lengi að koma henni á fætur og koma einhverju ofan í hana. Ég þurrkaði hana og hitaði upp, með hárblásara. Ég kom mjólk í hana og lagði hana svo á hitapoka í kassa hjá kindinni. Í morgun kom ég henni á fætur og setti hana á spena. Ég held að hún sé hólpin
Þetta er fyrirburinn. Gimbur undan 15-219 Stroffu og 16-577 Ára. Hún fæddist 9 dögum fyrir tal
Hin sem var að bera, var tvílembdur gemlingur sem átti tal 29. apríl. Ég athugaði hana á milli þess sem ég var að stússast í fyrirburanum og mér fannst allt vera eðlilegt. Tvær lappir og snoppa. Svo gekk þetta ekkert hjá henni og ég ákvað að grípa inní (fjórir tímar síðan belgurinn sprakk). Ég togaði í lappirnar og reyndi að koma hausnum út, en ekkert gekk. Allt í einu kom þriðja löppin í ljós og ég togaði í hana og þá gekk þetta. Ég hef ekki lent í því áður, að löpp af hinu lambinu komi með, og alveg í gegnum grindina, þar að segja áður en kindinni er hjálpað. Ég hef lent í því að bæði lömbin ætli sér að koma í einu og að maður þurfi að velja hvaða lappir maður eigi að taka í, en þá er það löpp á hinu lambinu. En þetta tókst á endanum og lömbin lifa.
Þetta er gemlingurinn sem bar í nótt. 16-267 Klessa. Hún átti hrút og gimbur. Þau eru undan 16-575 Gera.
Komnar 4 gimbrar og 3 hrútar
Ég held að það komi tveggja daga pása í burði, en ég ætla samt að vakta þær 
Molinn kveður
