Ísabella. Hún er þrílembingur, undan 11-313 Glæsu og 16-571 Þyrli. Hún fæddist mjög lítil
Breki. Hann er tvílembingur, undan 16-289 Búbbu og 16-575 Gera. Móðir hans steig ofan á hann, fljótlega eftir að hann fæddist, þannig að hann lærbrotnaði. Þórður og Simmi settu spelku á hann og þeim tókst að laga þetta, þannig að hann gat gengið nánast óhaltur. Núna sér maður ekki á göngulaginu, að hann hafi brotnað. Svo fékk hann sólarofnæmi í sumar og það sér aðeins á andlitinu. Það er ýmislegt lagt á hann greyið
Mollý. Hún er tvílembingur, undan 10-502 Mysu og 16-576 Liða. Mysa drapst á sauðburði. Við vitum ekki ástæðuna
Muldra, systir Mollýjar. Undan 10-502 Mysu og 16-576 Liða
Dís. Hún er tvílembingur, undan 15-226 Dós og 12-004 Þokka. Dós afneitaði henni, þannig að við tókum hana í heimalingahópinn 
Glóý. Hún er einlembingur, undan 11-309 Eygló og 16-572 Máv. Eygló hefur farið af stað með annað fóstur, það sást á hildunum. Eygló fór afvelta og drapst, á sauðburði
Dammi. Hann er þrílembingur, undan 10-505 Ritu og 16-576 Liða. Hann var svo mikill klaufi að sjúga móður sína, að það endaði með því að hann var tekinn undan og hafður sem heimalingur. Auðveldara fyrir hann að sjúga pela/túttufötu, en spena
Pollý. Hún er undan 14-170 Porru og 16-576 Liða. Porra var þrílembd og í ljós kom að annar speninn var alveg lokaður. Við tókum tvö lömb undan henni og vöndum undir aðrar kindur. Lengi vel ætluðum við henni að hafa þetta lamb, en hinn speninn var eitthvað skrítinn og að lokum var ekki hægt að ná neinni mjólk úr henni. Við tókum þá Pollý undan henni í hópinn okkar
Örg. Hún er undan 16-271 Öld og 13-390 Andrési. Öld átti tvær gimbrar, en hún mjólkaði þeim ekki, þannig að við tókum hana í heimalingahópinn
Nói. Hann er fjórlembingur, undan 12-087 Slenju og 15-572 Eitli. Hann fór út með móður sinni, en skilaði sér heim að fjárhúsum nokkrum dögum seinna. Þá hafði Slenja afneitað honum. Slenja hefur farið á stað með fleiri en fjögur. Það sást á hildunum
Þá eru þau komin, öll 10. Þau hafa verið til friðs í sumar. Hafa ekki verið að fara eitthvað á flakk. Ef það hefði verið þá hefðum við keyrt þau á fjall
Molinn kveður
